曹仁超——熊二策略

响熊市中保持做旁觀者心態並唔壞。响熊市二期只能發掘偏低嘅二線股作炒賣，又係樂趣之一。今年10月至今唔少二線股已回升50％或以上，有D更達100％，例如新濠國際（200），此乃熊市中保持30％資金喺股市中活動嘅樂趣。熊市二期只須分析未來三至六個月前景已經足夠，毋須分析十二個月或以上嘅問題；揀股對象就係未來三至六個月有一定抗跌力嘅股份（或跌幅過大嘅股份），呢D大部分係二線股。至於點樣分辨「山羊」同「綿羊」？便需要經驗同埋智慧。

唔係所有二線股喺熊市二期中皆上升，亦唔係所有二線股喺熊市二期皆回落。响退潮中，唔係所有船隻都會浮起（食水深嘅大船往往浮唔起），有D更擱淺咗冇法浮起，只有等下一上升浪，反而舢舨仔最容易浮。今年5月起我老曹已一再警告唔好投資石油股同資源股，因為世界再次面對過剩，情況有如1981年；銀行股亦少沾手，因為仍未衰夠；至於地產股，到今年11月香港地產股可睇好（因利率下降），內房股仍在分辨龍與鳳（良莠不齊）。

熊市二期仍能上升嘅股份，需要：一、良好資產負債表；二、良好現金流；三、抗跌力高；四、擁有別人不能模仿嘅科技；五、有一定派息。上述五大條件中起碼符合三個，才能喺熊市二期反彈，例如早前推介嘅冠君產業（2778），依家已證明升幅不俗，相信完成消化後，仍有力進一步上升。